[Pandaona rumbo rwuri kuimbwa seanthemu yeHIFA, ndati nditeerere. Rwandi zipa chaizvo.
Ndafunga kuti zvimwe zvingabatsirao mazwi acho akava muChiShona tianzwisise tose tose.
Hameno kuti anoimbika here [semunhu anehuyanga pakuimba] asi ndinofunga kuti pane vangapagonawo ipapo. Hameno kuti pane anogonawo here kupinzwa rwiyo rwacho muChiNdevere kana imwe mitauro yemuZimbabwe. Tino tora zvakawanda zvekune dzimwe nyika tichizviita zvedu asi tisinga simudzire zvedu zvakanaka. Rwumbo harusi rwedu zvedu asi kurwuimba mumitauro yekwedu zvinga simudzire kuimba nenzira dzakasiyana siyana.]
zvipingidzo zvingakura pakadii
ndino kurao kuzvipfuura
kure kupi kungaiswa kodzero dzangu
ndino mhanya kusvika ikoko
kana mukandi ramba
kana kuringa zvenyu kumwe
hazvinei, nekuti…….
..
[korasi]
chakasimba chiri mandiri
ndino ziva kuti ndino zvikwanisa
kunditadzira kwamunoita
mai funga kuti handichina madado
asi pane chakasimba chiri mandiri
..
pamuno rambisisa kunzwa izwi rangu
ndipo pandino nyaudzisa rumbo rwangu
hwandai seri kwemazidziro eJeriko
manyepo enyu achaondomoka pasi
mungandi nyima zvenyu nguva yangu pano
muchiparadza upfumi nehwangu
asi mwenje wangu uchapenya chaizvo
uchakupoforai maziso
nekuti……
..
[korasi]
chakasimba chiri mandiri
ndino ziva kuti ndino zvikwanisa
kunditadzira kwamunoita
mai funga kuti handichina madado
asi pane chakasimba chiri mandiri.
..
vakoma ne hanzvadzi
vakasimbira vachiti hatikodzere
isu tinoziva zvimwe
ingo varingai pameso muchiti:
ndichangozviita chete
ndichangozviita chete.
..
[korasi]
chakasimba chiri mandiri
ndino ziva kuti ndino zvikwanisa
kunditadzira kwamunoita
mai funga kuti handichina madado
asi pane chakasimba chiri mandiri
..
vakoma ne hanzvadzi
vakasimbira vachiti hatikodzere
isu tinoziva zvimwe
ingo varingai pameso muchiti:
ndichangozviita chete
ndichangozviita chete.
..
muturiki : Farai Madzimbamuto
Ndichitanga kukuona,
Ndaikuvenga chaizvo
Ndaisada kukuona
Wainge ibwe, waitoda sando kuti ndikupaze
Ndaipotsa kurutsa?
Apo ndaikudya
Nguva yakati yafamba
Mazuva, mwedzi, zvapindana
Ndakazotanga kukuda zvishoma nezvishoma
Wakazoti zvino woitwa neunyanzvi ,
Naana godobori vezvekubika!
Ndainge ndisisadi kurega kukudya!!
Ndaiti ndikakushaya,
Ndaiswera ndichisvimha, iyoka misodzi yeropa??
Nekuti ndaive ndapinda newe murudo kuti nya-a, Read more
Maongororo ano gutsa meso senhumbu
Ndino ona maruva kutumbuka pamuti
Usina pfumvudza, kuti mwacha zidzumbu
Hwema huno tasva mhepo kuenda rwendo
Igwezvo kushiri nenyuchi, kwandiri paditi
Idonhodzo ndofunga shupiko renge hondo
Muchini unopipidza, wada kuti ndiongorore
Kundidzora ndigadzirise pasave nengozi pakati
Inozondi tevera kwandinoenda sendine chakaorera
Kuzeya kwaunoita muti mumhepo, turuva tuchidonha
Ndinonzwa uteta mumuviri, makore afuga makuti
Ndaataya ndirikure nepadare, ndiri kuno kumatonho
Muti uchaita muchero, uchadyiwa nevachauona
Ini chasara kukushumuka, ndoorera ndove sauti
Pakashaya ano paradza, pachava ne chekuona.
Farai Madzimbamuto
pazvakavambwa, watambarara shamwari
ko, zvawafamba wega, mwana waMwari
chokwadi zvaguma here, wasiira ani
ndima yako . Ko kapadza kako, mupini
hakachina anobata. Watisiya hama tashama
dai ndaiziva chakakuroya, hama
chakakubaya chatibaya pahana
chatyokera munyika, hapachina kutana
hausiwega munzira, tichabatana
nemabasa ako haurovi ; watisiya kudai takashama.
tasvimha tose tose, kufunga iwe
kufunga vana, vako nevedu mwachewe
tinokuwana kupi kana worwadza mwoyo
zvawava nyikadzimu, waenda kumweya.
Farai Madzimbamuto
Jan 2009
[ndichiyeuka Chiremba Isidore Pazvakavambwa
akatisiya musi wa 25 Januari 2009]
Pandigere pano pachituro, ndakatarisa madziro. Akachena kuti mbuu. Hapana chimwe chiripo kunze kwe kakarenda kakati nama kunge kadzvanga. Ndikatarisa madziro, nguva dzose ndiko kandinoona. Kane mufano wemunhu agere pamutariro mudziva achi raura. Akandipira gotsi, saka hazvinyatsooneka kuti munhukadzi kana kuti munhurume.
Pandigere pano pachituro, ndikatarisa kurudyi ndinobva ndaona panze. Zuva riri kupinda nepa hwindo. Ndino ona matenga edzimba kusvika kuma gumo eziso. Ndiri paf’ro yechitatu. Dzimba dziri pedyo ndine maf’ro matatuwo. Pane imba yatakatarisana nayo, ndino ona mahwindo ayo, asi handiwone mukati. Ndinombo funga kuti vemo kana vachiringa kuno, vano ona mukati meyedu here. Semunhu ari kuraura uyo, akatipira gotsi, anofungidzira here kuti kunevanhu varikumuona. Read more
Mbeu yevanhu vosvika muno yati siyanei neyedu patakasvika. Isu taivinga chikoro, kana kuzotora twumakosi twekutiwanisa mabasa ane musoro, toshanda kwemakore, tichironga kuzodzokera kumusha takagukuchira upfumi. As ava vouya ava, huwi-i, mabasa chaiwo.
Pane mukomana akasvika mwedzi wapfuura. Hameno kwazvakanhongana nemukadzi weChirungu anenge ane dzakadambuka dzose. Mungadai mavaona nhasi pavasvika pano kuzopemberera Zimbabwean Independence Day nesu, chikara chichizvidhonza haikona, hanzi ndine wangu, isu tikati, “Tamuona!” Ndamutarisa mukomana uyu ndikanzwa misodzi yoda kudonha. Nhai shiye zvayo, mwana akakurira kuruzevha, kunozvuviwa nechembere zvayo. Anga ashayei kumusha? Chero mumaruzevha zvamuzere vasikana vanogona kutsvoda wani. Read more
Iyi ngano iyi ndakainzwa musuuno. Yakandifadza chaizvo ndikati zvimwe pane anga nakidzwa wo nayo .
Zvinonzi musuuno, VaTsvangirai nekufamba famba kwavarikuita, vaifamba zvavo muAddis Ababa. Vainge vari kutevedza mumvuri we stubhu vachitaura zvavo nevamwe vaiva vava shamwaridza muguta imomo. Vakaerekana vadzivirirwa pamberi pavo nemumwe murume. Aive mukuru asi asati achembera - sezvatakangoita wo isusu. Aive ne mhumhu mudiki asi akakombama kombama musana. Muruwoko rwerudyi maive mune mubhadha murefu uri mukobvu, waito enzana kureba naVaTsvangirai. Kufamba aito zendamira mubhadha uyu onzvizvuva. Tsanda dzemumaoko dzaive dzakakura dzakati tande kurakidza kusimba chaizvo. Read more
teyoupfumi
Ndaiti zvimwe mudyandigere
Muteyo wehupfumi
Nanga kuposha vamwe.
pagomo
pagomo papfigwa
ndararisa murapwi
ndanzwa. Nhau mapopopo. Read more
Mandiwana ! Mandibata ! Handityi !
Handizi ndega. Ndiri ‘fandareva.
Ndionerei zvenyu pasi. Muchapagara.
Kwamuri ndiri mbeu yeparuware.
Asi ndipo paino onekwa nevakawanda
Rovai zvenyu. Pondai ! Handirove.
Magaro, tsoka, musana, sikarudzi.
Chirarai hope dzandashaya, dzimai
Pfungwa nezvipo, muumbavha gutsanai
Kundipfuudza kusandigumisa.
onai meso avanhu, ringai maziso avo
Ndiri mwenje mubako. Uchapisa.
Kunzwira vamwe kuti vave vanhu, semi.
Farai Madzimbamuto
Nov 2008.
Hairambwi misodzi
kana yafunga kupopoma, kunyanya
kana ichibva muchitubu chemukatikati;
Hairambwi, hairambiki, hairambi–
inenge ingori nguva yacho,
maungira emupande wenguva
achizunguza zvangungu zvenzeve…
Next Page »
